دلوقتى الأخت سحر الجعارة تطلع تقول ان المرأة لها نفس حقوق الرجل في المجتمع،
والأخت إيناس الدغيدى تطلع تقول قصدى تقلع تقول ان الراجل همجى مش بيعرف في المرأة غير جسدها
والأخت إقبال بركة بتقول إن مصدر جمال المرأة هو عقلها مش جسدها ولازم التعامل معاها كعقل بدون النظر إلى الجسد .. ده باعتبار ان الواحدة تبقى ماشية في الشارع وواحد بقى يعاكسها يقولها يا ابو عقل جامد انت ..ياواد انت ياأبو مخ زى العسل..حوش شعرك عشان نشوف جمال عقلك يا قمر والواحد بقى يكلم صاحبه ويقوله ..شفت ياد العقل اللى لابس أحمر ده؟؟
والأخت هالة سرحان بيجيلها حالة فزع لو سمعت ان راجل بيقول لمراته حضَّرى العَشاء..باعتبار ان العشاء ده رجس من عمل الشيطان
والأخت اللى زى القمر سعاد حسنى تقول البنت زى الولد ماهيش كمالة عدد..ومش عارف مين قال ان البنت كمالة؟؟ ده البنت طبق كشرى بحاله من الكبير ده ابو تلاتة جنيه.. زيها زى الولد بالظبط
والأخت عبير صبرى بقى ربنا يهديها تقول ازاى الراجل المتوحش القاسى التنين اللى بيطلع نار من مناخيره ده بيتعامل مع الأنثى اللى هي نسمة ماشية على الأرض
طبعا الكلام دة كلة ميدخلش دماغى لان انا عارف ان الولد المحترم بيعامل البنت المحترمة ازاى.. والزوج المحترم بيعامل الزوجة المحترمة ازاى ومش محتاجين نصايح و الحمد لله
المشكلة بقى مادام بيقولوا البنت زى الولد.. يبقى أنا ليه بقى باقوم أقف في المترو عشانهم ؟؟
أيوة انا بتكلم بجد مش بهزر دلوقتى دى مشكلة كبيرة مش صغيرة على فكرة ..يعنى أنا لما اركب المترو كام مرة في اليوم وكل مرة اكتشف انى لازم اقف عشانهم تبقى مشكلة ولا مش مشكلة بزمتكم
أدخل المترو في أمان الله واقعد بعد جهد كبير وانا شايف واحدة موظفة مع صاحبتها راجعين من الشغل برضه وصحتهم زى الفل مشاء الله.. وقاعدة تحكى ليها ازاى تعمل محشى الكوسة وقاعدة تقور في الهواء يمين وشمال عشان يبقى الشرح عملى بقى وصوتها عالى مشاء الله.. وأول ما تدخل المترو تلاقى الشلل الرعاش نزل عليها فجاءه.. وعينيها مش قادرة تفتح من الإرهاق وتيجى هيه وصاحبتها قدامى بالظبط وتعلى صوتها
وتقول لصاحبتها:
ياختى مبقتش أقدر أقف كتير يا فوزية..
ترد عليها زميلتها واللبانه فى بقها
ومين سمعك يا حبيبتى
الدكتور قال لى انى لو وقفت على رجلى خمس دقايق ها أرجع على اللى قدامى علطول
يع يع يع
ولا البنت اللى لسة شباب بقى .. تبقى قاعد لا بيك ولا عليك وتلقى المحروسة داخلة المترو .. بنت حلوة وشعرها ع الخدود يهفهف ويرجع يطير.. وتيجى تقف قدامك.. وفجأة تفضل تظبط شعرها وترميه ورا ضهرها زى إعلان صابون كامى ..ومتوقعة ان الزبون اللى هوه انا هاقوم ابوس ايديها علشان تقعد مكانى..بس ده بعنيها ,,,
وبعدين فى الأول كانت عربيات السيدات في المترو قدام ومع ذلك كانوا منتشرين في كل العربيات وقلنا ماشى..بعد ماحصلت حادثة بتاعت مترو حلوان البسيطة اول المترو.. قالوا لا .. هاتوا السيدات في نص المترو..ليه بقى؟؟
ده باعتبار ان لو حادثة حصلت في أول المترو والسيدات قدام هيصوتوا ويلموا الدنيا انما الرجالة بتموت من سكات!!!
طب حد مننا اعترض ان السيدات ماليين مترو الرجالة.. أبدا محدش أعترض ولا حاجة ..انما شوف بقى ياعم الحاج لو حظك المنيل وقعك انك ركبت في عربية السيدات غلط ولا مش واخد بالك ..ياويلك يا سواد ليلك ..تسمع بقى أحلى كلام.. أولالا.لا.سوفاااج..سوهاج..راجل؟؟..واللى تحط وشها في الأرض من الكسوف..واللى تقول أوووه.. راجل..
انتى عمرك ماشفتى راجل ياختى؟؟؟مش برضه انتى جاية من شغلك وكان فى هناك منه وراجعة بيتك هتلاقى واحد من نفس الفيرجن في وشك
والبنت اللى في الجامعة آه لو شافت راجل في المترو.. هيغمى عليها من الخضة..
ماانتى لسة جاية من الجامعة وكنتى انتى والولاد قاعدين تلعبوا لعبة الصراحة والمنديل .. عمرك ماشفتى راجل ياانسه؟؟؟؟
أيوة مادام فيه مساواة تبقى ف كل حاجة بقى
. زى ماأنا بشتغل وهيه بتشتغل.. يبقى اللى يلحق الكرسى الاول هو اللى يقعد باعتبار انها عبده ابن خالى يعنى عادى ..ومادام فيه مساواة ولازم نتعامل مع عقل البنت.. يبقى بلاش تلعب فى شعرها وتورينى دايما انها بتحط شامبو هيد أندشولدرز ضد القشرة عشان اقوم..لأنها زى ما بتحط هيد أندشولدرز أنا باحط برضه هيد أندشولدرز ومن الحجم الكبير كمان أبو خمسه وعشرين جنيه..
اوعى حد يفتكر انى مش باقوم عشان حد يقعد لا انا بقوم
.بس باقوم عشان حد يستاهل.. يعنى ست كبيرة مريضة.. راجل عجوز تعبان.. ست شايلة تسع عيال على ايديها..كده يعنى.. حالات تستاهل.. انما واحدة عندها تلاتين اربعين سنة وقاعدة عاملالى فيها حسين رياض لما اتخرس في رد قلبى.. أقف ليها ليه؟؟
وكمان بقى .. لما اقف أنا عشان واحدة ست تفضل واقف جنبها..وأول ما تيجى تنزل محطتها تشاور لاقرب بنت أو ست عشان تقعد مكانها!! صلاة النبى..حتى الكرسى بيتورث يا جدعان؟؟ خيال مآتة واقف جنب الكرسى؟؟؟دانا واقف عشانك..طب خليها بجميلة حتى..وموقف قدام موقف تكتشف في لحظة ان كل الستات والبنات قاعدين..وكل الرجالة ماسكين جرايد وقاعدين يهووا عليهم: ألف ليلة وليلة.. قصة كل ليلة..
ولا البنت اللى تيجى تقعد جنبك ومش طايقة نفسها قال إيه المكان ضيق ومش قادرة تقعد مرتاحة..
طب ما دام انتى متضايقة كده ماتقومى تقفى بلاش القعدة المقرفة دى.. ................ الله يخرب بيت هالة سرحان وإيناس الدغيدى وسحر الجعاره وعبير صبرى وإقبال بركة وكل اللى عقدونا فى عيشتنا بكلامهم اللى ولا دين ولا منطق بيأيده.
.بيطالبوا بحقوق المرأة اللى على كيفهم.. مع ان ديننا جعل المرأة جوهرة يتحافظ عليها وتتعامل أحسن معاملة مش سلعة وموضوع في كل برنامج شوية.
نصيحة منى بقى ... لو كنت قاعد على كرسى في المترو.. دايما حاول انك تربط رباط جزمتك وانت قاعد لمدة العشرين تلاتين محطة اللى انت راكبهم وماتبصش لأى حد واقف عشان قلبك الطيب
وخد معاك مطوة عشان لو قلبك الطيب خلاك تقعد واحدة وبعدين وهي نازلة شاورت لواحدة تانية تقعد مكانها وطنشتك.. تغزها بالمطوة غزتين عشان تفوق
والسلام عليكم ورحمة الله وبركاته
رشا عضو جديد
الجنسيه ـ :
الابراج :
مزاجك : الجنس :
عدد المساهمات : 20 تاريخ التسجيل : 10/01/2010 العمر : 35
موضوع: رد: البنت زي الولد ومش كمالة عدد الإثنين يناير 11, 2010 12:13 pm
موضوع: البنت زي الولد ومش كمالة عدد 
الأربعاء يناير 06, 2010 5:24 pm
هاقوم ابوس ايديها علشان 
